Hvað kostar verkefnastjórnin við hinn nýja Landspítala ?

Það væri nú alveg ágætt að vita hve mikill hluti fer í stjórnunarkostnað við þetta verkefni, svona í ljósi umræðunnar um önnur stjórnendalaun á þessu sviði
á sviði heilbrigðismála undanfarið.

kv.Guðrún María.

Fullyrðingar um kostnað fjarri öllum sanni

Stjórnarskrármálið er pólítískt viðundur síðari tíma hér á landi.

Ég er sammála Birni Bjarnasyni varðandi stjórnlagaráðið að þar er á ferð nefnd eða ráð, sem skipuð er af sitjandi stjórnvöldum, og fáránlegt að sjá ráðsmenn í einhvers konar " kosningaherferð" um eigin tillögugerð.

Forsætisráðherra staðfesti það í stefnuræðu sinni á eldhúsdegi að ríkisstjórnin hyggst nota þetta mál til þess að slá sig til riddara af sem teljast verður vægast sagt " lýðskrum " þar sem engin efnisleg meðferð hefur farið fram fyrir tilstuðlan sömu stjórnvalda og skipuðu nefndina eftir ógildingu Hæstaréttar á kosningu til stjórnlagaþings.

Aldrei hefði mér getað dottið það í hug að endurskoðun stjórnarskrár landsins myndi geta fallið í þennan farveg sem nú er til staðar í málinu, þar sem kjörnir fulltrúar hafa enga aðkomu að málinu.

kv.Guðrún María.

Spyr hver hafi lofað nýrri stjórnarskrá

Umsvif Ríkisútvarpsins úr öllum takti við annað í þessu samfélagi.

Mér hefur löngum verið það óskiljanlegt hvers vegna RUV telur sig þurfa að reka sérstaka tónlistarrás, þ.e Rás 2, en þetta hlutafélag er rekið með nefskatti á landsmenn, alla, ásamt þáttöku á auglýsingamarkaði, sem aftur skekkir alla samkeppnisstöðu annarra á þeim smáa markaði.

Því til viðbótar hefur það verið allt að því viðtekin venja að hinir og þessir "innanbúðarmenn " sem hafa verið dagskrárgerðarmenn, til lengri eða skemmri tíma, en gefa einnig út tónlist til sölu og er hampað eins og silkihúfum með spilun fram og til baka.

Það er allavega mín upplifun.

Rekstur tveggja rása er óþarfur og einkum og sér í lagi tónlistarrásar sem koma má fyrir í dagskrá Rásar eitt.

kv.Guðrún María.

Ekki kemur til uppsagna á Rás 1

Alvarlegt mál, og aðstæður lögreglumanna á Íslandi eru eitthvað sem þarfnast skoðunar við.

Brot gegn valdstjórninni hefur gegnum tíðina verið talið alvarlegt mál og það hið sama skyldi áfram gilda að mínu viti, en aðstæður lögreglumanna hér á landi er eitthvað sem Alþingi hlýtur að þurfa að taka til skoðunnar hvað varðar nægilegan mannafla að störfum við verkefni löggæslu í landinu.

Hvað veldur því að refsirammi er vannýttur í málum sem slíkum er ekki skiljanlegt.

kv.Guðrún María.

Vægt tekið á ofbeldi gegn lögreglu

Alltaf verið vitað að Íslendingar fá enga sérsamninga um sjávarútveg við Esb.

Einlæg andstaða mín við aðild að Evrópusambandinu byggist fyrst og fremst á vitneskju um það að innganga í þetta bandalag þýðir afsal yfirráða yfir fiskimiðum þjóðarinnar.

Mig skiptir litlu hvort ég hlýði á þennan eða hinn reyna að telja mér trú um það að Íslendingar geti náð sérsamningum og skoða skuli hvað komi upp úr pakkanum, það fer einfaldlega inn í annað eyrað og út um hitt, því slíkt hefur ekki verið raunin í innlimun ríkja í þetta bandalag.

kv.Guðrún María.

Verða að samþykkja löggjöf ESB

Nokkur orð um vinnuálag.

Því miður ég endurtek því miður einskorðast vinnuálag ekki við heilbrigðisstéttir eingöngu, heldur hefur slíkt verið viðtekin venja í vinnuumhverfi hins opinbera í allt of mörg ár, undir formerkjum sparnaðar.

Vinnuálag sem engin launaumbun kemur fyrir og stjórnendur treysta á að starfsmenn taki slíku með hugsjón eina fyrir störfum þeim hinum sömu.

Mín reynsla á vinnumarkaði er úr uppeldismálum og menntakerfinu og á sínum tíma í Reykjavik var starfsmönnum greitt fyrir það ef undirmönnun var til staðar í vinnu, en það var afnumið og hér í Hafnarfirði hef ég ekki heyrt slíkt nefnt þann áratug sem ég starfaði hér.

Meðan félög launamanna hvort sem um er að ræða fagfélög eða ómenntaða láta þetta yfir sig ganga þegjandi og hljóðalaust í áraraðir, gerist ekki neitt til betrumbóta.

kv.Guðrún María.

Álagið eiginlega ómannlegt

Ný stjórnarskrá hefur ekkert að gera með spillingu í stjórnmálum.

Alveg hreint er það nú ótrúlegt hvað mönnum dettur í hug að velta upp í okkar hrærigrautarsamfélagi málamyndasjónleiksúrlausna.

Spillingu verður ekki forðað með því að breyta stjórnarskránni, spilling mun aldrei einskorðast við einstaka flokka heldur athafnir manna sem þar taka þátt, sem hluti af heildinni, alveg sama hvaða flokkum eða flokksbrotum viðkomandi tilheyra á hverjum tíma.

Gjörsamlega burtséð frá því hver stjórnarskrá eða lagasetning er í landinu.

kv.Guðrún María.

Borgarafundur um nýja stjórnarskrá

Um daginn og veginn.

Eplið fellur sjaldan langt frá eikinni segir máltækið og ég sem stundum gerði grín að pabba, varðandi söfnun á alls konar drasli, verð nú að viðurkenna að ég er alveg eins, geymi hluti von úr viti og þarf að beita mig hörðu við að henda einhverju.

Það hefur þó tekist hjá mér að grisja pínulítið undanfarna daga, og áfram skal haldið á sömu braut, því óvissan sem ég er í er þess eðlis að það atriði að henda drasli sem ég þarf ekki, hjálpar mér ef ég þarf að fara héðan úr Hafnarfirði.

Hef annars notið þess að geta gengið úti undanfarna daga eftir að ég náði heilsu aftur til að fara í gönguna mína, sem ég þakka mínum sjúkraþjálfara.

Því fylgir andleg næring að ganga meðfram læknum í hrauninu hér við bæjardyrnar, því lækjarniðurinn tekur hugann frá áhyggjum og amstri og yndislegheit náttúrunnar umfaðmar mann í orðins fyllstu merkingu.

kv.Guðrún María.

Ráðherra ríkisstjórnarinnar leggur samstöðu heilbrigðisstarfsmanna í rúst.

Meginábyrgð á launahækkun þessari ber ráðherra heilbrigðismála sem semur um þá hina sömu við forstjóra stofnunarinnar og sú hin sama ríksstjórn sem viðkomandi ráðherra tilheyrir.

Hér er um að ræða störf við bráðasjúkrahúsþjónustu landsmanna, sem og aðra þjónustu er lýtur heilbrigði innan veggja sjúkrahúsa, þar sem sannarlega skiptir máli að sátt og eining ríki um störf öll, og sem aldrei fyrr á tímum niðurskurðar fjármuna til starfsseminnar.

kv.Guðrún María.

Hækkun leggur samstöðu í rúst

Heilbrigðisráðherra ber alla ábyrgð á þessu máli og hann á að segja af sér.

Vinnubrögðin í þessu máli eru þess eðlis að ég sé ekki að ráðherra sé mikið lengur sætt í embætti, vegna þess hins sama og sannarlega vakna spurningar um það hvort slíkt eigi sér stað á fleiri stöðum í stjórnkerfinu án þess við vitum um.

Það kemur í ljós en ráðherra ætti að sjá sóma sinn í því að víkja sæti vegna þessa máls.

kv.Guðrún María.

Reiðin á spítalanum alvarlegt mál