Hvað á að setja mikið af lögum í lagasafnið sem hægt er að færa inn í önnur gildandi lög ?

Það getur ekki verið að til þurfi að koma sérstök lagasetning á Alþingi um réttarstöðu einstaklinga með kynáttunarvanda, er leitt hefur til þess að viðkomandi hefur farið í kynskiptiaðgerð.

Einfaldlega vegna þess að þar er um að ræða, það fáa einstaklinga að réttarstöðu viðkomandi HLÝTUR að vera hægt að færa inn í gildandi lagabálka er varða réttarstöðu viðkomandi.

Nú þegar er sannarlega nógu mikið til af lögum sem eru algjörlega óþörf um efni sem hægt er að færa inn í gildandi lög í landinu.

Sérstök lög um slík mál kunna einnig að varða fleira en réttindi viðkomandi, því skyldi ekki gleyma, og þar á ég við það atriði að einhverjir hafa hugsanlega að því atvinnu að sérhæfa sig í kynáttunarvanda og sérlög um það hið sama mál því hugsanlega til þess fallin að tryggja atvinnuhagsmuni.

kv.Guðrún María.

Tillögur að frumvarpi um réttindi transfólks

Með ólíkindum að ekki skuli til staðar nú þegar áætlanir fyrir hvert sveitarfélag á höfuðborgarsvæðinu.

Einu sinni enn rita ég um þetta mál, er varðar það atriði að ekki skuli nú þegar vera til staðar almannavarnaáætlanir hér á höfuðborgarsvæðinu.

Áætlanir sem kynntar hafa verið almenningi um það hvert viðkomandi á að leita ef hugsanlega þyrfti að yfirgefa heimili sín.

Ég gerði mér litið fyrir hér um árið þegar ris hófst í Eyjafjallajökli og spurðist fyrir um almannavarnaráætlanir á svæðinu, þar sem mínir nánustu bjuggu, og fékk greinargóð svör frá þeim aðilum sem ég beindi fyrirspurnum að á þeim tíma, en þá var verið að fara í gang með undirbúning áætlanna sem síðar þurfti að nota og nýta vegna eldgoss í jöklinum.

Áður en það kom til var íbúum ljóst, hvert átti að fara ef yfirgefa þyrfti heimkynni sín, því það hið sama var búið að kynna.

Hér á fjölmennasta svæði landsins er ekkert slikt til staðar sem telja má með ólíkindum í raun.

Vonandi geta menn komið slíku á koppinn áður en eitthvað kemur upp á í þessu efni.

kv.Guðrún María.

Auka þarf viðbúnað verulega

Um daginn og veginn.

Það er ótrúlegt hvað tíminn flýgur áfram þótt maður sé ekki lengur hluti þeim sem getur farið til sinnar vinnu hvern dag.

Ég er svolítið fúl yfir því að fá þetta hálkuvesen aftur núna, því þá get ég ekki gengið mína göngutúra, en hef farið í sund til að hreyfa mig, en hreyfingin skiptir mig máli til þess að halda mögulegum styrk til athafna og koðna ekki niður.

Ég hef fundið mér verkefni við að prjóna, og ef ég passa mig á því að sitja ekki of lengi í einu við það þá slepp ég við verkjavesen.

Ég er í sjúkraþjálfun einu sinni í viku sem hjálpar til við að minnka verkjatilstand.

Ég reyni að velta mér ekki upp úr því hvernig ég er, því það hið sama bætir ekki ástandið og maður verður að halda áfram í því vona að kanski geti maður orðið aðeins skárri með tímanum.

kv.Guðrún María.

Gat beðist afsökunnar í Kastljósi, en gerði ekki !

Viðkomandi þingmaður fékk tækifæri til þess að iðrast þess að hafa tengt voðaatburð við þjóðfélagsástand, sem var algjörlega óviðeigandi af hans hálfu sem þingmanns, en það gerði hann ekki heldur hélt áfram við sinn málflutning í þessu sambandi.

Ég er sammála geðlækninum varðandi það að hann grafi undan trausti sjálfum sér til handa, en tel að hann grafi einnig undan trausti á þeim stjórnmálasamtökum sem hann starfar fyrir og hörmulegt ef menn ætla að reyna að hampa slíkum viðhorfum þar sem skortur á siðviti er til staðar.

kv.Guðrún María.

Segir Þór fara frjálslega með staðreyndir

Eplið fellur sjaldan langt frá eikinni.

Umsamin laun á vinnumarkaði, þar með talið lágmarkstaxtar eiga að nægja til framfærslu einstaklinga í einu þjóðfélagi.

Verkalýðshreyfingin getur því ekki kastað frá sér boltanum til stjórnvalda hvað varðar umræðu um fátækt, meðan lágmarkstaxtar á vinnumarkaði samræmast ekki neysluviðmiðum þeim sem reiknuð hafa verið út í þessu sambandi.

Upphaf mikillar fátæktargildru margra var á sínum tíma frysting skattleysismarka sem verkalýðshreyfingin andmælti ekki svo nokkru nemi.

kv.Guðrún María.

Mörg íslensk börn alast upp í fátækt

Bjóða íslensk stjórnvöld upp á námskeið í íslensku máli ?

Það er vissulega áhyggjuefni ef innflytjendur eiga þess ekki kost að sækja námskeið í íslensku og afar fróðlegt væri að vita hvernig að þeim málum er staðið nú hér á landi ?

kv.Guðrún María.

Fjórðungur Pólverja án atvinnu

Sýndarmennskuréttarhöld sem kosta fjármuni.

Tilgangur þess að láta fara fram " pólítiskt uppgjör " með Landsdómi féll um sjálft sig þegar Alþingi var þess ekki umkomið að draga báða stjórnarflokka sem sátu við stjórnvölinn til ábyrgðar, heldur einn mann forsætisráðherrann.

Ein helsta hneisan er einnig í því fólgin að sá flokkur sem þar var til staðar, gegnir nú forystu í ríkisstjórn landsins, þar sem að hluta til er um sömu ráðherra að ræða og sátu við hrunið.

Þetta sýndarmennskuréttarhald mun því litlu skila þegar upp er staðið að ég tel, nema kostnaði til handa skattgreiðendum við störf við dómstólinn.

kv.Guðrún María.

Sjö vitni fyrir landsdóm á morgun

ALDREI skyldu menn láta sér detta í hug að tengja ofbeldisverknað við þjóðfélagsástand.

Ég verð að játa það að ég hefi verið orðlaus yfir því að lita augum yfirlýsingar þess efnis að ofbeldisverknaður komi ekki á óvart.

ALDREI, aldrei nokkurn tímann getum við ellegar við skyldum reyna að gera minnstu tilraun til þess að útskýra ofbeldi hvers eðlis sem er, við þjóðfélagsástand.

ALDREI.

Að menn skuli láta sér detta í hug að ræða um þann alvarlega atburð/glæp sem varð í gær í tengslum við fjármuni er hreint út sagt fáránlegt og ég lít svo á menn skorti siðvit sem slíkt viðhafa.

Að sitjandi þingmaður á Alþingi Íslendinga eða aðrir sem hafa tekið að sér að tala máli hópa, láti sér detta í hug að tengja slíkt þjóðfélagsástandi, bókstaflega brýtur á réttlætisvitund minni.

Hafi þeir skömm fyrir.

kv.Guðrún María.

Árásin kemur Þór ekki á óvart

Kostnaðarþáttaka sjúklinga í íslensku heilbrigðiskerfi.

Hvernig má það vera að læknar sem hafa samninga við hið opinbera um gjaldskrá, geti hækkað þá hina sömu gjaldtöku, að sjálfdæmi, til handa sjúklingum sem leita þurfa þjónustu sem er ráðlögð og á að vera hluti af heilbrigðisþjónustu ?

Getur verið að stjórnvöld standi sig ekki í stykkinu og segi upp samningum þar sem slík gjaldtaka er til staðar ?

Eru menn algjörlega úti á túni í þessum efnum, líkt og fyrri daginn þegar kemur að þessu málasviði ?

Það getur ekki verið að einhvers stétt hvaða stétt svo sem á í hlut geti í krafti stöðu sinnar hækkað gjaldskrá umfram það sem kveður á um í samningum sem gilda meðan nýjir hafa ekki verið gerðir.

kv.Guðrún María.

" Þú getur bara " lækað " okkur ".....

Getur það verið að ný sögn sé kominn til sögu í íslensku máli, þ.e. sögnin að
" læka " ?

Ég heyrði þessa frásögn í útvarpi á dögunum, " þú getur bara farið inn á síðuna og lækað okkur ".....

Auðvitað er enskan þarna stílfærð í íslenskan búning í töluðu máli, og ekki fyrsta skiptið sem það má heyra EN, getum við ekki vandað okkur aðeins pínulítið meira og rætt um það að ef viðkomandi líkar við fyrirtækið sé hægt að láta það í ljósi á síðunni með því að ýta á einn takka.

Íslenska orðið lækur er fallegt orð og hvers konar afbökun þess fer fyrir brjósti á mér, ekki hvað síst í óskyldum tilgangi að mér finnst.

kv.Guðrún María.