Og verður nú rokið til og hrókerað.... ???

Prósentutölur í könnunum hafa löngum haft áhrif á stjórnmálamenn, og í þessari könnun kemur það fram að utanþingsráðherrarnir eru vinsælastir.

Ef til vill taka menn til við að skipta um stóla til þess að reyna að auka trúverðugleika ellegar setja nýja menn inn.

kv.Guðrún María.

Flestir ánægðir með störf Rögnu

Viturlegt að hafa fyrirhyggju meðferðis.

Ekki er ráð nema í tíma sér tekið, og það er viturlegt af Ferðafélaginu að taka mark á veðurspám á þessu svæði á þessum árstíma.

 

kv.Guðrún María.

Aflýsa ferðum á morgun

Góð og holl orð biskups.

Sannarlega er það áleitin spurning hvort hins óendanlega frelsis hafi fundist mörk, og vorum hamagangi í dansinum kring um Gullkálfinn.

Það þarf sterk bein til þess að þola góða tíma og það atriði að gildismatið gangi ekki af leið á slíkum tímum er eitthvað sem hver þarf að spyrja sig um sem slíkt upplifir.

Hinn mannlegi þáttur, hann má ekki falla í valinn, og kærleikur og virðing skyldi kristallast í því vekja von og bjartsýni um góða tíma fyrir Ísland, góða tíma á raunsæjum forsendum.

kv.Guðrún María.

 

Menning hræðslu og tortryggni sækir á

Markaðshyggjuþokumóðan, liggur hún enn yfir landinu ?

Margur verður af aurum api, segir máltækið, og ef til vill stöndum við frammi fyrir því sú kynslóð sem nú ríkir í landinu að hafa horft steinþegjandi á alls konar þróun mála í þá veru.

Alls konar hugmyndafræði hefur tröllriðið húsum undir formerkjum hinnar heilögu markaðsvæðingar allrahanda, innan þings og utan þótt sú hin sama markaðsvæðing hafi ekki skilað þjóðarbúinu því sem til var ætlast í upphafi.

Í upphafi skyldir endir skoða, segir annað máltæki og það atriði að markaðsvæða þrjú hundruð þúsund manna samfélag, sem alla jafna telst ekki markaður er eitthvað sem upphaflega hefði átt að vera til sem forsenda alls.

Of mikið frelsi í þessu efni gaf færi á einokun sem enginn þóttist koma auga á ellegar meintar eftirlitsstofnanir hins opinbera virtust geta komið í veg fyrir, sennilega vegna loðinnar lagasetningar um þau hin sömu mörk.

Nú höfum við fengið vinstri stjórn í landinu sem margir hyggja að kynni að hafa breytt um stefnu, en er það svo ?

Hver er stefnubreytingin við afskriftir þeirra sem mest skulda og hver verður samkeppnisaðstaða þeirra sem ekki spenntu bogann of hátt ?

Jú almenningur skal borga brúsann í formi skattahækkanna , af óráðsíutilstandinu öllu, meðan ráðamenn hafa ekki hugsað sér að lækka eigin laun sem skyldi , né heldur draga úr umsvifum hins opinbera. Hið opinbera á að auka atvinnu í boði skattgreiðenda á vinnumarkaði eins fáránlegt og það er.

Ábyrgð stjórnvaldsathafna er eins og fyrri daginn hér og þar og út um víðan völl, eftir því á hvern stendur veðrið og hvort er við stjórnvölinn.

Engu munaði að núverandi stjórnvöld væru búin að telja almenningi trú um að samþykkja þyrfti ómögulegar skuldbindingar til handa komandi kynslóðum, þar sem setja átti skuldbindingar misviturra ráðstafana eins og ekkert væri yfir á almenning í landinu, í boði vinstri stjórnar.

Forseti hlustaði á fólkið og það er vel sem komið hefur viti fyrir stjórnvöld að vissu leyti og sett málið í annan farveg.

kv.Guðrún María.

 

Á að leyfa gönguferðir að gosstöðvum á þessu svæði ?

Það hlýtur að fara að verða áleitin spurning hvort yfir höfuð að gefa leyfi til þess að fólk sé á gönguferðum að gosstöðvum með þessa staðsetningu.

Auðvitað geta óhöpp alltaf orðið hvarvetna, en þrjú þyrluútköll vegna óhappa í gönguferðum á gosstöðvar á einum degi, er full mikið að mér finnst.

Eldgos þetta er í óbyggðum og sannarlega nægilegur fréttaflutningur sem við fáum af þróun mála ásamt því að geta skoðað gosið í beinni á vefmyndavélum.

En það nægir ekki öllum, því fer sem fer.

kv.Guðrún María.

 

Slasað fólk sótt í Þórsmörk

" Upp upp mín sál og allt mitt geð....

upp mitt hjarta og rómur með.

Hugur og tunga, hjálpi til,

herrans pínu ég minnast vil. "

Þetta erindi er það sem setið hefur fast í huga mér, gegnum tíðina, úr sálmum sr.Hallgríms Péturssonar en kveðskapur hans hefur öðlast dýpri merkingu eftir því sem árin líða.

Píslarganga frelsarans, er eitthvað sem okkur kristnum mönnum er óhjákvæmilega hugleikin um þessar mundir og vissulega geta margir heimfært sínar aðstæður hvers eðlis sem eru sem ákveðna píslargöngu í nútíma lífi, ekki hvað síst þegar skóinn kreppir í voru samfélagi og lífsbaráttan harðnar.

Vonin sem fólgin er í upprisu frelsarans er ljós í líf mannsins, og bænin er lykillinn að þeirri hinni sömu von.

Bæn um hið góða og leiðsögn í vegferð gegnum torfærur á vegum okkar mannanna.

kv.Guðrún María.

 

Passíusálmar lesnir í dag

Myndi EKKI ganga frá Skógum að gosinu.

Ekki myndi ég láta mér detta það í hug að ganga frá Skógum að gosstöðvum, einfallega vegna þess að ég er ekki göngugarpur sem gengið gæti á Esjuna og þaðan upp í Mosfellsdal.

Einn ágætur maður benti mér á það að þetta væri nákvæmlega vegalengdin og hæðarmismunurinn, og ekki á allra færi að leggja í slíkt.

Því til viðbótar eru veðurskipti þarna uppi með því móti að meira segja að sumri þarf að vera virkilega með áreiðanlegar veðurspár framundan svo vitið sé reitt meðferðis.

kv.Guðrún María.

 

Smala fólki af gossvæðinu

Er þetta aprílgabb ?

Ég get svo svarið að það er örstutt síðan að ég sá hækkun á þorski og ýsu, er verið að hækka aftur ?

kv. Guðrún María.

Verð hækkar á þorsk og ýsu

Og fleiri þingmál " Vinnumarkaðsstofnun "........

Hér er smá sýnishorn af enn einu þingmáli af þessu áttatíu og eitthvað.....

" Þskj. 945  —  555. mál.

Frumvarp til laga

um Vinnumarkaðsstofnun.

(Lagt fyrir Alþingi á 138. löggjafarþingi 2009–2010.)

I. KAFLI
Vinnumarkaðsstofnun.
1. gr.
Stjórnsýsla.

    Vinnumarkaðsstofnun er sérstök stofnun sem heyrir undir yfirstjórn félags- og tryggingamálaráðherra.
    Félags- og tryggingamálaráðherra skipar forstjóra Vinnumarkaðsstofnunar til fimm ára í senn. Forstjóri skal hafa lokið námi á háskólastigi. Forstjóri ræður aðra starfsmenn stofnunarinnar og annast daglegan rekstur hennar. Jafnframt ber forstjóri lagalega og rekstrarlega ábyrgð á stofnuninni gagnvart ráðherra.
    Vinnumarkaðsstofnun skal reka þjónustustöðvar um landið og eru þær hluti stofnunarinnar. Félags- og tryggingamálaráðherra ákveður hvar á landinu þjónustustöðvar stofnunarinnar skulu vera að fenginni umsögn forstjóra og stjórnar stofnunarinnar. Jafnframt er ráðherra heimilt, að fenginni umsögn forstjóra og stjórnar stofnunarinnar, að ákveða hvort þjónustustöðvar stofnunarinnar verði sameinaðar þjónustustöðvum annarra opinberra stofnana.
    Kostnaður af rekstri stofnunarinnar greiðist úr ríkissjóði samkvæmt fjárlögum hverju sinni og af öðrum tekjum hennar.

2. gr.
Verkefni Vinnumarkaðsstofnunar.

    Verkefni sem Vinnumarkaðsstofnun er ætlað að sinna eru meðal annars að:
    a.      annast stjórnsýslu á sviði vinnumarkaðsmála og vinnuverndarmála,
    b.      fjalla um og gera tillögur til ráðherra að stefnumótun á sviði vinnumarkaðsmála og vinnuverndarmála,
    c.      vera ráðherra og öðrum stjórnvöldum til ráðgjafar um vinnumarkaðsmál og vinnuverndarmál, þar á meðal gera reglulega grein fyrir atvinnuástandi og árangri vinnumarkaðsaðgerða,
    d.      hafa samráð við samtök aðila vinnumarkaðarins og aðra hagsmunaaðila eftir því sem við á,
    e.      veita fyrirtækjum og starfsmönnum þeirra margþætta þjónustu, aðstoð og aðhald,
    f.      veita atvinnuleitendum þjónustu í formi ráðgjafar, virkra vinnumarkaðsúrræða og vinnumiðlunar, þ.m.t. starfshæfnismats, starfsendurhæfingar og sérhæfðra atvinnutilboða eftir því sem við á hverju sinni,
    g.      samræma starfshæfnismat, þar á meðal að þróa og ákvarða hvaða mælitæki og aðferðir skuli nýtt til mats á starfshæfni í samstarfi við aðra aðila sem starfa á þessu sviði,
    h.      annast af opinberri hálfu skipulag starfsendurhæfingar og samhæfingu fjármögnunar,
    i.      stuðla að forvörnum og heilsuvernd á vinnustöðum,
    j.      annast eftirlit með aðbúnaði, hollustuháttum og öryggi á vinnustöðum sem og annað eftirlit á vinnumarkaði sem henni er falið með lögum,
    k.      safna gögnum um ástand á vinnumarkaði og um vinnuvernd og gefa reglulega út upplýsingar þar um, þar á meðal halda skrá yfir hvers konar sjúkdóma, andlega sem og líkamlega, sem ætla má að stafi af starfsumhverfi, tíðni þeirra og útbreiðslu,
    l.      veita fræðslu og upplýsingar varðandi aðbúnað, hollustuhætti og öryggi á vinnustöðum, svo sem um nýja tækni og þekkingu sem stuðlað getur að umbótum á aðbúnaði, hollustuháttum og öryggi á vinnustöðum,
    m.      vinna að rannsóknum á sviði vinnumarkaðsmála og vinnuverndarmála,
    n.      meta samspil áhættu, samfélagslegs kostnaðar og hvata fyrirtækja til virkrar vinnuverndar og aðgengilegs vinnumarkaðar,
    o.      stuðla að þróun og notkun staðla, innra eftirlits og vottunar á sviði vinnuverndar og aðgengilegs vinnumarkaðar,
    p.      annast verkefni sem stofnuninni er falið með öðrum lögum,
    q.      vinna önnur verkefni á sviði vinnumarkaðsmála og vinnuverndarmála eftir nánari ákvörðun ráðherra.
    Félags- og tryggingamálaráðherra er heimilt að kveða nánar á um verkefni Vinnumarkaðsstofnunar í reglugerð. ".........................

 

Já já já enn ein stofnun.... eða hvað ?

kv.Guðrún María.

Hér kennir margra grasa í þingmálum.

Meðal annars þetta."

Þskj. 976  —  585. mál.

Frumvarp til laga

um breyting á lögum um útlendinga, nr. 96 15. maí 2002,
með síðari breytingum (Schengen, framfærsla o.fl.).

(Lagt fyrir Alþingi á 138. löggjafarþingi 2009–2010.)

 

1. gr.

    Við 4. gr. laganna bætist ný málsgrein, svohljóðandi:
    Dómsmálaráðherra er heimilt að setja með reglugerð nánari reglur um þátttöku Íslands í sjóðum, stofnunum og verklegu samstarfi í tengslum við samvinnu á ytri landamærum á grundvelli skuldbindinga samkvæmt samningi sem undirritaður var í Brussel 18. maí 1999 um þátttöku Íslands í Schengen-samstarfinu.

2. gr.

    Í stað 4. og 5. málsl. 2. mgr. 11. gr. laganna kemur nýr málsliður, svohljóðandi: Greiðslur í formi félagslegrar aðstoðar ríkis eða sveitarfélags teljast ekki til tryggrar framfærslu samkvæmt þessu ákvæði.

3. gr.

    C-liður 1. mgr. 15. gr. laganna orðast svo: Útlendingur sýnir fram á að framfærsla hans hafi verið trygg á dvalartíma hans og að hann hafi getað og geti framfleytt sér hérlendis með löglegum hætti. Útlendingastofnun er m.a. heimilt að afla skattframtala og gagna frá skattyfirvöldum því til staðfestingar. Greiðslur í formi félagslegrar aðstoðar ríkis eða sveitarfélags teljast ekki til tryggrar framfærslu samkvæmt þessu ákvæði. Heimilt er að víkja frá þessu skilyrði ef framfærsla hefur verið ótrygg um skamma hríð og ríkar sanngirnisástæður mæla með því.

4. gr.

    3. málsl. 1. mgr. 31. gr. laganna orðast svo: Sama gildir um ákvörðun um afturköllun skv. 16. gr. og um ákvörðun um brottvísun útlendings sem hefur dvalarleyfi eða búsetuleyfi, EES- útlendings sem hefur skráð sig hér á landi skv. VI. kafla eða norræns ríkisborgara sem hefur dvalið hér á landi lengur en þrjá mánuði.

5. gr.

    Lög þessi öðlast þegar gildi.

Athugasemdir við lagafrumvarp þetta.

    Frumvarp þetta er samið í dómsmála- og mannréttindaráðuneytinu. Í því eru lagðar til nokkrar breytingar á lögum um útlendinga, nr. 96/2002.
    Markmiðið með breytingunum er tvíþætt. Í fyrsta lagi að heimila ráðherra að setja nánari reglur um þátttöku Íslands í samstarfi á ytri landamærum Shengen-ríkjanna. Í öðru lagi að endurskoða breytingar sem gerðar voru á lögum um útlendinga á árinu 2008, annars vegar að því er varðar skilyrði til framfærslu og hins vegar að því er varðar frestun réttaráhrifa ákvörðunar um brottvísun EES-útlendings sem hefur skráð sig hér á landi skv. VI. kafla laganna.

Athugasemdir við einstakar greinar frumvarpsins.

 

Um 1. gr.

    Með ákvæðinu er dómsmálaráðherra heimilað að setja reglur um þátttöku í sjóðum, stofnunum og verklegu samstarfi í tengslum við samvinnu á landamærum á grundvelli Schengen- samstarfsins. Með Schengen-samningnum var eftirlit með ferðum manna yfir innri landamæri samningsríkjanna fellt niður en eftirlitið á ytri landamærum ríkjanna styrkt. Þátttaka í sameiginlegum verkefnum á þessu sviði er Íslandi mikilvæg og þykir þess vegna rétt að heimila ráðherra að setja nánari reglur um það hvernig samstarfinu skuli háttað í framkvæmd, þ.e. þegar það kallar ekki á að gerðar séu breytingar á lögum.

Um 2. og 3. gr.

    Um er að ræða lagfæringu til samræmis við skilyrði sem sett eru til veitingar á íslenskum ríkisborgararétti. Breytingin sem gerð var á lögum um útlendinga með lögum nr. 86/2008, sem tóku gildi 1. ágúst 2008, hefur í för með sér víðtæk áhrif til takmörkunar á réttindum útlendinga sem löglega dvelja hér á landi og hafa áunnið sér rétt til bóta almannatrygginga eða atvinnuleysisbóta. Lagt er til að lögunum verði breytt aftur til fyrra horfs, þannig að einungis félagsleg fjárhagsaðstoð ríkis eða sveitarfélaga séu framfærslugreiðslur sem ekki teljist til tryggrar framfærslu við mat á því hvort skilyrði eru til að veita dvalarleyfi eða búsetuleyfi hér á landi.

Um 4. gr.

    Með ákvæðinu er bætt inn í 3. málsl. 1. mgr. 31. gr. laganna að ákvörðun um brottvísun EES-útlendings sem hefur skráð sig hér á landi skv. VI. kafla laganna megi ekki framkvæma fyrr en ákvörðunin er endanleg. Þar sem EES-útlendingar fá ekki lengur útgefið dvalarleyfi sér til handa við löglega dvöl í landinu þykir rétt að taka af allan vafa í þessum efnum.

Um 5. gr.

    Greinin þarfnast ekki skýringa.



Fylgiskjal.


Fjármálaráðuneyti,
fjárlagaskrifstofa:

Umsögn um frumvarp til laga um breyting á lögum um útlendinga,
nr. 96/2002, með síðari breytingum.

    Með frumvarpi þessu er í fyrsta lagi lagt til að ráðherra verði heimilað að setja með reglugerð nánari reglur um þátttöku Íslands í sjóðum, stofnunum og verklegu samstarfi í tengslum við samvinnu á ytri landamærum Schengen-ríkjanna. Í öðru lagi er lagt til að einungis fjárhagsaðstoð ríkis eða sveitarfélaga sé framfærslugreiðslur sem ekki teljist til tryggrar framfærslu við mat á því hvort skilyrði eru til að veita dvalarleyfi eða búsetuleyfi hér á landi. Loks er lagt til að ákvörðun um brottvísun EES-borgara sem skráð hefur búsetu sína hér á landi í þjóðskrá og dvalist hefur í landinu í þrjá mánuði eða lengur verði ekki framkvæmanleg fyrr en ákvörðun er endanleg.
    Með þátttöku í samstarfi á ytri landamærum Schengen-ríkja er Ísland nú þegar aðili að sjóðum og stofnunum samkvæmt samningi en væntanlegri reglugerð er ætlað að festa betur í sessi það fyrirkomulag. Ekki er því gert ráð fyrir auknum kostnaði ríkisins vegna þess. Áætlað er að verklegt samstarf í tengslum við samvinnu á ytri markaði verði aukið en það gengur út á að efld verði svokölluð neyðarteymi sem geta verið til staðar ef upp kemur vandræðaástand í öðrum Schengen-ríkjum auk námskeiða um málefni samstarfsins. Með frumvarpi þessu er verið að veita ráðherra heimild til setningar reglugerðar um slíkt samstarf og hefur það því ekki verið útfært nákvæmlega né kostnaðarmetið á þessu stigi.
    Verði frumvarpið óbreytt að lögum verður þannig ekki séð að það muni hafa í för með sér aukin útgjöld fyrir ríkissjóð. "

Þessi setning kemur verulega á óvart satt best að segja.

"  Greiðslur í formi félagslegrar aðstoðar ríkis eða sveitarfélags teljast ekki til tryggrar framfærslu samkvæmt þessu ákvæði. "

kv.Guðrún María.

 

 

 

Á níunda tug þingskjala