Lítill vandi að moka út spillingu ef þú veist hvar á að stinga niður skóflunni.

Spilling er af mörgum toga frá þvi smæsta upp í það stærsta, en klíkuþjóðfélagið sem við lifum í hefur að hluta til samsamað sig ákveðnum lögmálum valdaskiptingar millum ríkjandi afla lengst af þar sem völd og taumar til valda hafa hvoru tveggja tengst þeim sem fengið hafa oftast meirihutakosningu, sem og þeim sem komið hafa ár sinni fyrir borð í viðskiptalífi og fengið frjálsræði til athafna án mikillar rýni fjölmiðla.

Framsóknarflokkurinn hefur meira og minna ásamt Sjálfstæðisflokknum ráðið málum í gömlu atvinnuvegum þjóðarinar sjávarútvegi og landbúnaði.

Gömlu kratarnir og allaballar hafa fengið að ráða heilbrigðismálakerfi og menntakerfi að miklum hluta til gegnum árin, en Framsóknarflokkur og Sjálfstæðisflokkur aðeins drepið niður fæti.

Viðskiptaumhverfisformúlan sem varð þjóðinni að falli er í boði gamla Alþýðuflokksins og Sjálfstæðisflokksins ásamt Framsóknarflokknum og síðar Samfylkingunni.

kv.Guðrún María.

Margir telja spillingu ríkja í þjóðfélaginu

Um daginn og veginn.

Í fyrsta skipti í langan tíma svaf ég út, og átti friðsælan frídag þar sem tími minn fór í það að vera heima hjá mér og hvergi annars staðar.

Frídagur verkalýðsins skyldi jú vera frídagur, en sjálf tel ég mig til verkalýðs þessa lands, hafandi starfað á vinnumarkaði nú samfleytt yfir þrjátíu ár og einn dagur á ári sem sérstakur frídagur því afar kærkominn.

Hafði reyndar hugsað mér að skoða hvort færi í kröfugöngu en þegar ég sá að upptaka evru var eitt stefnumála sem ganga átti undir í mínu bæjarfélagi þá var sjálfkrafa heima setið.

 Mér finnst hins vegar ganga allt of seint að mynda starfhæfa ríkisstjórn að loknum þingkosningum í okkar landi og öðru vísi manni áður brá í þvi efni þegar það tók hálfan dag að mynda ríkisstjórnir.

 Hvað veldur í því efni á eftir að koma í ljós.

kv.Guðrún María.

Stjórnmálin snúast um hagsmuni fólksins í landinu ekki hagsmuni stjórnmálaflokkanna.

Þegar flokkar verða að stofnunum þar sem allt virðist miðast við það atriði að viðhalda " flokknum " án tengsla við fólkið, þá er illa komið.

Hve opin og lýðræðisleg vinnubrögð iðka þeir flokkar sem starfa i landinu, hvað varðar opna fundi um mál öll sem til umræðu eru hverju sinni ?

Það ætti nú ekki að vera ýkja flókið að taka það saman af heimasíðum stjórnmálaflokkanna, hve oft menn funda um hin ýmsu mál, um land allt.

Fari hagsmunir fólksins og hagsmunir flokka ekki lengur saman, þá er eitthvað að.

kv.Guðrún María.

Hagsmunir vinnandi stétta í landinu.

Síðustu áratugir hafa verið sorgarsaga hvað varðar kjör á vinnumarkaði, þar sem fulltrúar verkalýðsins hafa samið um launataxta sem engan veginn hafa þjónað tilgangi sínum til mannsæmandi framfærslu einstaklinga i einu þjóðfélagi að lokinni skatttöku af þeim hinum sömu launum.

Frysting skattleysismarka á sínum tíma var hneisa til handa stjórnvöldum og fulltrúum verkalýðsins og með ólikindum að slíkt skuli ekki hafa verið dregið upp á borðið þar sem menn myndu axla þá ábyrgð gjörða sinna.

Ofurskatttaka af allt of lágum launatöxtum gerði lítið annað en að letja menn til vinnuþáttöku, en þá komu til þær breytingar að óheft flæði vinnuafls hingað til lands, brúaði bil á vinnumarkaði í ákveðinni ofþenslu eins samfélags. Verkalýðsfélögin þögðu mörg þunnu hljóði þótt fólk af erlendu bergi brotið sem kom hingað til vinnu, tæki laun á töxtum sem þó ekki nægðu til framfærslu í landinu.

Stór hluti af fólki af erlendu bergi brotnu hefur nú misst vinnuna og hefur lítil réttindi á vinnumarkaði. Aðstæður þeirra eru ekki góðar í voru samfélagi, frekar en allra þeirra sem eru án atvinnu í landinu, nú um stundir.

kv.Guðrún María.