Vinstri Grænir vilja hætta við aðildarviðræður við Evrópusambandið, fram yfir kosningar.... ???

Nú skal stefnuskráin sem lofað var fyrir síðustu kosningar dregin upp úr salttunnunni sem hún var sett ofan í til þess að hoppa upp í ráðherrastóla með Samfylkingunni, hvað varðar Evrópusambandsaðild.

Enginn einn flokkur hér á landi hefur nokkurn tímann gengið eins mikið á skjön við eigin stefnu í einu máli að loknum þingkosningum eins og VG, í þessu efni.

Það hefur kostað þennan flokk þingmenn á brott sem og mun það án efa kosta atkvæði í kosningum á vori komanda.

kv.Guðrún María.

Ferlið jafnvel lagt til hliðar

Um daginn og veginn.

Blessað tíðarfarið getur verið skrautlegt á þessum tíma og þótt rigni einn klukkutímann, þá kann að snjóa þann næsta og hlána þann þriðja og frysta þann fjórða.

Ég hef því undanfarið verið í eins konar upprifjun á akstri í slíkum aðstæðum sem manni fannst nú ekki mikið mál milli tvitugs og þrítugs en síðari ár eitthvað sem ekki hefur þótt mikið spennandi innanbæjar, hvað þá úti á dimmum vegum.

Sem betur fer hefur reynslubankinn nýst mér og ég komið sjálfri mér á óvart satt best að segja í þessu efni sem er ágætt en samt elska ég það að þurfa ekki að hreyfa bíl.

Jólaundirbúningurinn er annars hafinn á bænum í hinu og þessu en eins og venjulega undanfarin ár, en enn er ég samt að dúllast í því að koma mér fyrir á nýjum stað sem verður hluti af jólum þessa árs.

Ég er búin að fara í fyrsta tíma í sjúkraþjálfun á Hvolsvelli og fer aftur í næstu viku en þjálfunin hefur verið mitt haldreipi hvað heilsutetrið varðar.

Ég æfi mig nú á þvi að þrifa fallega húsið sem ég bý í, í áföngum, pínulítið á hverjum degi eins og ég get þann daginn og svo áfram þann næsta.

Allt fær sinn tíma og stað smám saman.

kv.Guðrún María.

Læknafélag Íslands, nýr stjórnmálaflokkur ?

Má Alþingi ekki álykta um heilbrigðismál nema Læknafélagið rísi upp til handa og fóta ?

Hér er ekki um lagafrumvarp að ræða, heldur þingsályktunartillögu á Alþingi og án efa fengi Læknafélagið umsagnarrétt ef útbúið yrði frumvarp til laga um málið.

Hér er einkenni ofurforsjárhyggju að mínu viti með keim af varðstöðu fyrir eigin atvinnuhagsmunum að hluta til, þótt auðvitað skuli það viðurkennt að niðurskurður til heilbrigðismála sé mikill nú þegar.

kv.Guðrún María.

Læknar leggjast gegn tillögunni

Björn Valur og Lúðvík hafa talið að allir væru að horfa á Alþingisrásina.

Það er alltaf eitthvað nýtt á þingi að sjá má.

Hvorum skyldi hafa dottið uppátækið í hug ?

Óhjákvæmilega kemur upp í hugann gamli Hafnarfjarðarbrandarinn um það hvers vegna Hafnfirðingar fara út í glugga i eldingum, sem ku vera vegna þess að þeir hinir sömu telja að það sé verið að taka af þeim myndir......

Það skal tekið fram að ég hef verið Hafnfirðingur þar til nú nýlega.

kv.Guðrún María.

„Þarf ekkert að kenna mér“

Lágmarkskrafa að Talsmaður neytenda sé ópólítískur.

Eðli máls samkvæmt eru neytendur innan hinna ýmsu flokka og það atriði að talsmaður þeirra hinna sömu sé þáttakandi í pólítisku starfi fyrir einn eða annan stjórnmálaflokk, er eitthvað sem einfaldlega á þar ekki heima að mínu áliti.

Reyndar finnst mér sama máli gegna um kosningu þess hins sama á stjórnlagaþing þar sem mér var og hefur verið illa sýnilegt hvernig það fer saman að starfa við gerð nýrrar stjórnarskrár og starfa á sama tíma sem embættismaður hins opinbera eftir gildandi stjórnarskrá.

kv.Guðrún María.

Gísli áfram í embætti að sinni

Mikilvægt að fylgjast með ferðalagi sóknaráætlunarfjármagnsins.

Afar fróðlegt verður að fylgjast með því í hvað, hvar og hvenær þessir fjármunir sem hér um ræðir verða settir.

Er hér verið að úthluta pólítískum bitlingum fyrir kosningar, eða hvað ?

Upphæðin til handa ákveðnum landshlutum felur ekki í sér einhverjar stórkostlegar framkvæmdir sýnilega en eins og áður sagði þá er það mikilvægt að sjá í hvað þessi fjármunir eiga að fara.

kv.Guðrún María.

400 milljónir í sóknaráætlun 2013

Íslensk verkalýðshreyfing er handónýtt afl fyrir launþega, því miður.

Verkalýðshreyfingin hér á landi ber stóra ábyrgð á því hruni sem íslenskt samfélag hefur mátt meðtaka, einkum og sér í lagi með andvaraleysi og aumingjahætti um varðstöðu fyrir kjörum launamanna í landinu.

" Þungar áhyggjur, bla, bla, bla.... "

Þetta höfum við látið bjóða okkur launamenn gegnum tíðina, alls konar yfirlýsingasamsuða sem ekkert stendur bak við og sömu menn eru endurkosnir í stjórnir ár eftir ár af nokkrum sem mæta á fundi, enda ekkert gert til að virkja hinn almenna félagsmann.

Þegar forystumennirnir láta síðan af störfum þá fara þeir sjálfir í stjórnir lífeyrissjóðanna alla jafna og sitja þar í áraraðir eins og ekkert sé sjálfsagðara.

Upphaflegur tilgangur og markmið verkalýðsbaráttu til handa launþegum hér á landi hefur orðið að skiptimynt á hinu pólitiska sviði, þar sem menn halda kjafti til skiptis eftir því hver er við stjórnvölinn en alvöru hagsmunavarsla er engin.

kv.Guðrún María.

Þungar áhyggjur uppi

" Skein yfir landi, sól á sumarvegi.... "

Það var fallegt hér í Fljótshlíðinni í dag, heiðskýr himinn og umhverfið allt í sinum fegursta skrúða.

 

 

Eyjafjallajökullinn með sinn hvíta hatt og skýjalaus.

 

 

 

 

 

 

 

 

 

 

Jafn fallegt var að líta austur yfir Markarfljótsaura.

 

 

 

 

 

 

 

 

 

 

 

 

 

 

Og út í Eyjar.

 

 

 

 

 

 

 

 

 

 

 

 

 

Hafi einhver öðlast nýjan og dýpri skilning á því hvers vegna Gunnar vildi hvergi fara forðum, af þessum slóðum, þá er það sú er þetta ritar.

 

 

kv.Guðrún María 

Endurnýjun ???

Það skyldi engan undra að þingmaðurinn Björn Valur nyti ekki brautargengis eftir það atriði að hafa gengið út yfir velsæmismörk með vanvirðingu við forseta landsins sem sitjadi þingmaður.

Hins vegar má spyrja að því hvort mikil endurnýjun hafi átt sér stað á lista þessa flokks en kanski er endurnýjun ekki í myndinni þegar viðkomandi flokkur á sæti við stjórnvölinn.

kv.Guðrún María.

Katrín efst en Birni Val hafnað

Aðlögun innanlands.

Ég er innflytjandi í Rangárþing Eystra og er nú í aðlögun sem slík, hvað varðar það atriði að finna út eftir efnum og aðstæðum hversu mikið ég þarf að flakka eftir því sem vantar til heimilis sem og að sækja mina sjúkraþjálfun á svæðinu.

Allt kemur þetta í ljós og maður aðlagast nýjum aðstæðum í nánasta umhverfi en kyrrðin og fegurðin sem fylgir íslenskri sveit er yndisleg, og eins yndislegt er að heyra jarmandi kindur í kring um sig og horfa á hestana á túninu.

Mánaskin á hvítt hjarnið á Markarfljótsaurunum og snævi þaktan Eyjafjallajökulinn minn er ævintýri líkast.

Vestmannaeyjar við sjóndeildarhringinn og bílaruna úr Herjólfi á leið á Suðurlandsveg er eitt af því sem sést á þessum dimmasta tíma ársins, héðan, sem og ljósum prýddur Seljalandsfoss.

Í dag var hláka í sveitinni sem er ágætt þar sem það snjóaði all vel hér á dögunum, og aðeins má minnka af slíku.

með kveðju úr Fljótshlíðinni.
Guðrún María.