Hvaða verkefni er að takast Steingrímur ?

Ráðherra hóf mál sitt á svartagallsrausi um það verkefni að taka við völdum í efnahagslegri niðursveiflu, og sami gamli tónninn og sá hinn sami hefur viðhaft í áraraðir var fyrir hendi nú sem endranær.

Í ljósi þess að ráðherra lítur svo á að verkefni efnahagsmála sé að takast þá hefði ekki verið úr vegi að hefja ræðu með því að tala kjark í þjóðina, en það tækifæri var ekki nýtt til þess arna.

Það væri nú fínt ef landsmenn hefðu sömu sýn á stöðu mála og ráðherra, en ég tel að svo sé þvi miður ekki.

Það atriði að draga fram eldgos og hestapest, sem orsök þess að hagvaxtar nyti ekki við er aumt annað verður ekki sagt og einkenni þess vælutóns sem einkennt hefur stjórnarformið.

Nær hefði verið að benda á einhver atriði sem stjórnvöld teldu að kynni að auka hagvöxt á komandi árum en sleppa því að draga fram hamfarir sem enn standa mönnum nærri.

kv.Guðrún María.

„Verkefnið er að takast“

Athugasemdir

[Sigurður Haraldsson, 15.6.2010 kl. 01:47]

það er að takast að verja bankana og fjármagnseigendur!

[Guðrún María Óskarsdóttir., 15.6.2010 kl. 02:00]

Já já, það er rétt Sigurður.

kv.Guðrún María.

[Helgi Hrafn Gunnarsson (IP-tala skráð) 15.6.2010 kl. 03:18]

Sæl, Guðrún María. Vonandi hefurðu það gott.

Ég velti stundum fyrir mér hvað þyrfti til að skoðanasystkin þín færu að trúa því að ríkisstjórnin væri að "gera eitthvað".

Tvær spurningar spretta upp.

1. Fer fjármálaráðherra rangt með tölurnar? Eru þær ekki umfram væntingar?

2. Hvaða atvinnuleysistölur, hagvaxtartölur og þvíumlíkt myndir þú telja fullnægjandi af hálfu stjórnmálamanns sem er skipaður fjármálaráðherra skömmu eftir hrun stærsta bankakerfis sem Ísland hefur alið af sér? Hvað hefði verið viðunandi?

[Gunnar Heiðarsson, 15.6.2010 kl. 03:59]

Ég ætla að taka mér það bessaleyfi að svara Helga Hrafni, þó hann beri spurninguna upp til Guðrúnar, vona að þú fyrtist ekki við mig Guðrún.

1. Fjármálaráðherra fer væntanlega með réttar tölur, skárra væri nú. Hvort þær séu umfram væntingar fer eftir því hverjar væntingarnar voru og hver setti þær fram.

2. Erfitt er að svara hvaða atvinnuleysistölur, hagvaxtartölur og því um líkt sé ásættanlegt, eða hvað sé viðunandi. Hitt er annað mál að meðan ekkert er gert af viti til hjálpar heimilunum,munu þær tölur, sem ráðherra nefndi í sinni ræðu, verða fljótar að falla í haust.

Það sem áunnist hefur er einfaldlega vegna þess að fólkið í landinu hefur tekið á sig miklar byrgðar, mun meiri en hægt er að standa við til lengdar. Ef stjórnin fer ekki að átta sig á vandamálinu mun þetta koma illilega í ljós á haustdögum, með skelfilegum afleiðingum.

Það er einnig nokkuð undarlegt að ráðherra skuli ekki hafa nefnt skjaldborgina margfrægu í sinni ræðu. Þess í stað talar hann um eldgos og hrossasótt!

[Helgi Hrafn Gunnarsson (IP-tala skráð) 15.6.2010 kl. 16:05]

Þakka þér svörin, Gunnar.

Hvað leggurðu til að verði gert til bjargar heimilunum sem ekki hefur þegar verið gert? Nú þegar hafa verið sett lög um all skyns skuldbreytingar og frystingar til þess að reyna að leysa vandann, en það er ekki einfaldlega hægt að geta skuldirnar upp á bátinn. Eða hvað?

Sko, ríkisstjórnin hefur gert helling fyrir heimilin. Það er bara einfaldlega ekki nóg. Þvert á við það sem virðist vera almennt álit Íslendinga, þá eru yfirvöld ekki almáttug. Sú hugmynd að þau viti ekki hvað sé í gangi þykir mér bara hreinlega út í hött og ég veit satt best að segja ekki hvernig ég eigi að svara því.

En ég spyr þá, hvað ættu yfirvöld að vera að gera sem þau eru ekki að gera eða hafa ekki gert?

[Guðrún María Óskarsdóttir., 16.6.2010 kl. 01:13]

Sæll Helgi Hrafn.

Vonandi hefur þú það gott.

Þú veltir því fyrir þér hvað þarf til þess að trúa á aðgerðir stjórnvalda og það er einfalt, ég þarf að sjá þær virka ekki bara á eigin skinni heldur víðar um þjóðfélagið.

Það hefi ég þvi miður ekki séð, og tel þar meðal annars skort á almennum aðgerðum strax um leið og þessi ríkisstjórn tók við eina af forsendum þess að halda einu hagkerfi gangandi. Þess í stað var valin leið skattahækkana sem þorri manna mátti ekki við hér á landi, þegar atvinnuleysi er tveggja stafa tala.

Forgangsatriði hefði átt að vera að hækka EKKI skatta og helst lækka þá á tekjur manna til þess að halda heimilum gangandi við ofurverðbólgu.

Tölur eru tölur er tala litlu máli ef týnast allar forsendur í markaðseldabáli, og væntingar ráðherrans í þessu efni kunna að vera uppfylltar nú en væru það ekki væri sá hinn sami í stjórnarandstöðu svo mikið er víst.

Aðgerðir til handa skuldugum heimilum hófust á greiðsluaðlögun, er síðar var tekið til við að breyta í umboðsmann skuldara svo dæmi sé tekið sem aftur setur hóp manna í biðstöðu um aðgerðir sem slikar.

Með réttu má segja að betra hefði verið að gera lagasetningu sem slíka einu sinni ekki tvisvar, því slíkt veldur mismunun milli gildandi aðgerða og lagaheimilda í því efni sem og flókindum í þegar flóknum málum er varða skuldug heimili í landinu og möguleikum til lausna.

Það er ekki sama hvernig hlutir eru framkvæmdir og ekki nóg að tala um " helling " í því sambandi ef þessi " hellingur " virkar ekki í framkvæmd sinni.

Það er og verður hlutverk stjórnvalda að skapa skilyrði á hverjum tíma, til þess að hinn vinnandi maður geti lifað af launum sínum í einu landi, að loknum réttlátum skattgreiðslum, þar sem kerfi hins opinbera leggur áherslu, á að sinna grunnþjónustuþáttum við heilbrigði og menntun, og fjármunir skattgreiðenda nýttir á þá hina sömu þætti.

Ein ríkisstjórn á til dæmis aldrei að hækka álögur og gjöld um meira en 50 %, í einu lagi, það kallast offar stjórnvaldsaðgerða, en dæmi voru um 70 % hækkanir gjaldtöku fyrir ári síðan hér á landi.

Svo koma menn af fjöllum með vanda almennings við að komast af í landinu, því nóg var það að allt hryndi til grunna í einu fjármálakerfi þótt ekki kæmi ríkisstjórn til þess að hækka skatta í kjölfarið eins og að hella olíu á eld með víxlverkun launa og verðlags.

Í upphafi skyldi því endi allra aðgerða skoða Helgi.

góð kveðja. Guðrún María.

[Guðrún María Óskarsdóttir., 16.6.2010 kl. 01:21]

Vertu velkominn Gunnar.

kv.Guðrún María.