Hið faglega mat á því að salta og sparnaðarformúlurnar.

Það er alveg stórkostlegt að skýla sér bak við sérfræðinga varðandi " faglegt mat " þegar það hentar líkt og borgarstjórinn í Reykjavík gerði í Kastljósi kvöldsins, en ágætt hefði verið að fá fram upplýsingar um hver sparnaðarkrafan væri til handa því sviði sem sér um snjómokstur þetta árið, svo ekki sé minnst á tölur upp á blað.

Því ber hins vegar að fagna að gagnrýni á handvammagang borgarinnar í þessum efnum virðist hafa skilað sér með þvi móti að sveitarfélögin á höfuðborgarsvæðinu hamast nú í þvi að gera betur, hvert um annað þvert.

Ekki öfundaði ég Sigmar í Kastljósi kvöldsins við það að reyna að fá fram upplýsingar frá blessuðum borgarstjóranum.

kv.Guðrún María.

„Þetta var ófremdarástand“

Vaðlaheiðargöng.

Það er gefið mál að allir þingmenn kjördæmisins, hvar í flokkum sem standa vilja framkvæmdir í sínu kjördæmi, þannig er það og hefur verið um áraraðir.

Þingmaður hvað sem sá hinn sami heitir og situr í stjórn fyrirtækis um gangagerð á ekkert erindi í umræðu um málið í raun eða réttara sagt ætti ekki að sitja í stjórn fyrirtækis sem stofnað hefur verið um gangagerð þessa.

Það er einfaldlega óðeðilegt og breytir þar engu hvort sá hefur verið samgönguráðherra áður eða ekki.

Ég óska Norðlendingum sannarlega samgöngubóta eins og öðrum landsmönnum og veit að gangagerð gegnum fjallvegi skiptir máli í því sambandi, ég efast hins vegar um að framkvæmdirnar muni skila þeim arði til baka á þeim tíma sem til er ætlast og kemur þar tvennt til sögu.

Í fyrsta lagi eru auknar álögur á almenning í landinu eitthvað sem enn er ekki verðmetið inn í formúlur hvers konar að mínu mati og í öðru lagi eru hækkanir á eldsneyti með því móti að áhrifa mun gæta í enn frekara mæli, og allt spurning um upphæð gjaldtöku versus akstur yfir fjallveg á þeim tíma árs sem það er mögulegt.

Það er Alþingismanna að taka ákvörðun í þessu sambandi og meta og vega óvissuþætti þar að lútandi og ef til vill kemur á móti að atvinnusköpun varðandi framkvæmdir vegi upp það sem hér er nefnt.

Kemur í ljós.

kv.Guðrún María.

Helstu forsendur innan marka

Náttúruöflin sjá um seltuna.

Ég hef sjaldan séð glugga eins þakta salti og nú eftir þetta veðurgúlp, en það þarf nokkuð góða rigningu til að hreinsa það af.

Við getum hins vegar þakkað fyrir það hér á höfuðborgarsvæðinu að hafa rafmagn inni eins og venjulega en ég man ekki eftir alvöru rafmagnsleysi frá því ég fluttist á mölina.

Blikkið í kvöld varð eigi að síður til þess að kveikt var á kerti til vonar og vara ef slægi út, og kaffi lagað á könnuna til öryggis.

Við erum hins vegar ansi háð rafmagninu og oft hefur mér verið hugsað til þess að ekkert er víst að fólk eigi almennt tæki sem ganga fyrir rafhlöðum ef á þyrfti að halda, til dæmis til þess að hlusta á tilkynningar í útvarpi.

Jafnframt eru rafræn viðskipti það víðtækur máti að rafmagnsleysi hamlar sennilega flestu í þvi sambandi nú í dag.

Ég held að það sé ágætt að hugleiða hvað ef... einkum og sér í lagi þegar við erum minnt á það að rafmagn sé ekki endilega sjálfsagt með blikki eins og í kvöld.

kv.Guðrún María.

Ísing og selta olli trufluninni

Forvarnir eiga að byggjast á fræðslu um afleiðingar.

Það er nokkuð rétt að lítill áróður hefur verið hafður uppi varðandi það atriði að við eigum við vandamál að etja í formi ofþyngdar hér á landi.

Hins vegar er sjálfsagt að geta þess sem verið er þó að reyna en mér skilst að það standi til að skrifa upp á sérstaka hreyfilyfseðla af hálfu lækna, ef ég hef tekið rétt eftir sem er mjög gott mál.

Áhættuþættir hvað varðar stoðkerfi líkamans eru miklir einkum þegar liður á ævina og slit fer að segja til sín, jafnframt eru blóðþrýstingsvandamál fylgifiskur hjá mörgum.

Persónulega hefi ég þurft að taka þessi mál til skoðunnar, þar sem ég get ekki hreyft mig nema takmarkað eftir slys og afleiðingar þess, s.s, get ekki hlaupið, en þarf að nota og nýta það að geta gengið um það bil hálftíma á dag, án þess að verða verri af mínum vandkvæðum.

Vegna veðurfarsins og verri aðstöðu til gönguferða, þá reyni ég að passa mataræðið enn frekar, meðan það varir.

Það er allt til þess vinnandi að losna við það að safna á sig aukakílóum.

kv.Guðrún María.

Aðgerða er þörf

Eftirlit heilbrigðisyfirvalda með starfssemi lækna í landinu.

Nú árið 2012, hefur embætti Landlæknis enn ekki tekist að fá upplýsingar um allar framkvæmdar læknisaðgerðir á landinu, eins og kom fram hjá Landlækni í viðtali í Kastljósi kvöldsins.

Landlæknisembætti á hins vegar eigi að síður að hafa leyft slíka starfssemi sem hinn opinberi aðili, lögum samkvæmt, sem og ber embættinu að hafa yfirsýn yfir starfssemi alla.

Landlækni ber að skylda lækna til þess að skila inn upplýsingum um framkvæmdar aðgerðir, hvatning er ekki nóg, og á mér best vitanlega ekki heima í orðasafni embættismanna sem Landlæknis.

kv.Guðrún María.

Vanhæf borgaryfirvöld, varðandi snjómokstur.

Ef einungis er unnið á dagvöktum við snjómokstur, er þá ekki verið að spara ?

Að öðru leyti er það fáránlegt að ekkert hafi verið saltað eða sandað fyrir nokkrum dögum og útskýringar borgarstjóra um saltið og sandinn, eitthvað sem setja þarf vel á minnið er kemur að næstu kosningum Besta flokksins.

kv.Guðrún María.

Borgarstjóri biður um skilning

Sveitarfélög eiga að sjá um að losa stíflur úr niðurföllum, eða hvað ?

Því miður er það verulega sýnilegt hve mikill vilji virðist vera fyrir hendi til þess að skera niður nauðsynlega þjónustu í tíðarfari því sem ríkt hefur um skeið hér á Suðvesturhorninu.

Höfuðborg landsins kemur ekki vel út í þeim samanburði svo mikið er víst, og hálf furðulegt að sjá talin upp tæki, innan við fimmtíu að störfum á svo stóru svæði sem raun ber vitni að undanförnu.

Sveitarfélögin hljóta að þurfa að vera þess umkomin með eigin tækjakosti að takast á við veðurfar hér á landi, nú og til framtíðar og án efa þarf að endurskoða fyrirkomulag aðferðafræðinnar allra handa í þessu sambandi.

kv.Guðrún María.

Mikið um stífluð niðurföll

Umræðan í Silfri Egils í dag.

Venju fremur góður þáttur í dag hjá Agli, en það vildi til að tveimur mönnum bar þar saman um eina tegund af meintri spillingu í voru þjóðfélagi, varðandi það atriði að fjármunavarsla og skipun í stjórnir lífeyrissjóða í landinu, væri ámælisvert atriði.

Þetta voru þeir Stefán Jón Hafstein og Jón F.Thoroddsen.

Ég er þeim innilega sammála, jafnframt er það út úr kú að vinnuveitendur skuli einnig komnir í stjórnir lífeyrissjóðanna, gjörsamlega út úr kú.

Meðan við launþegar höfum látið þetta yfir okkur ganga þegjandi og hljóðalaust, ásamt þvi að alþingismenn látið sér þetta skipulag líka, þá breytist nákvæmlega ekki nokkur skapaður hlutur.

Það heitir að snúa hlutum á haus að lífeyrissjóðir séu nú nýttir til þess að halda fyrirtækjum gangandi á markaði undir formerkjum " Framtakssjóðs ", vegna efnahagslegrar niðurdýfu í einu þjóðfélagi.

Tilgangur og markmið verkalýðsfélaga í landinu er í uppnámi að minu viti og hefur verið nokkuð lengi, þar sem hagsmunavarsla sú sem vera skal til handa launþegum er illa eða ekki sýnileg, meðan flest snýst um vörslu lífeyrissjóðanna sem eru samtengdir félögunum og forystumönnum þar innan dyra eins og staðan er í dag.

Þar hvoru tveggja þarf og VERÐUR að skilja á milli.

kv.Guðrún María.

Hvað með Margréti og Birgittu ?

Ég sé að Þór segir að hann " haldi " að sama máli gegni um félaga sína og sig, varðandi það að þeir hinir sömu myndu styðja vantraust á ríkisstjórnina ef til þess kæmi, en er það raunin ?

kv.Guðrún María.

„Hugarburður og dylgjur“

Forsetinn bjargaði þjóðaskútunni af strandstað.

Jóni væri nær að senda forsetanum heillaóskir í stað þess að vera með orðagjálfur í hans garð.

Hér er hann einn af mörgum " aftursætisbílsstjórum ríkisstjórnarinnar "
sem telur sig gera vel að senda tóninn sem hinn eini sanni handhafi sannleikans allra handa eins hjákátlegt og það nú er.

Gagnrýni á val á manni ársins endurspeglar viljann til ritskoðunnar og forsjárhyggju, sem væri nú alveg ágætt leggja til hliðar.

kv.Guðrún María.

Forsetinn heldur áfram