Skilaboð til ráðherra og Alþingis um framkvæmd almannatrygginga.

Sú er þetta ritar slasaðist í vinnuslysi í fyrra, þá í 75 prósent starfi og atvinnulaus sem nemur 25 prósentum, þar sem greidd voru iðgjöld af atvinnuleysisbótum í stéttarfélag.

Eftir langa leit þar sem mér hefur verið vísað frá Pontíusi til Pílatusar innan kerfisins, þ.e. ég látin afla gagna og sækja um en síðan vísað frá hjá TR, virðist það koma í ljós að TR, getur ekki skipt sundur slysadagpeningum í hlutföll, eins og hægt er með sjúkradagpeninga og stofnunin segir að sé lögum samkvæmt.

Það gerir það aftur að verkum að einstaklingur sem verður óvinnufær vegna slyss, má þola það að ENGINN bætir þennan mismun í formi lágmarksalmanntryggingaréttar þrátt fyrir greiðslur iðgjalda af atvinnuleysisbótum i sjóði félaga.

Vinnuveitandi launamanns sem slasast og er í 75 prósent starfi fær greidda 100 slysadagpeninga en ekki 75 prósent, meðan viðkomandi launamaður nýtur launaréttar samkvæmt samningum.

Rétt skal vera rétt og þótt hér sé um litlar upphæðir að ræða þá skipta þær máli fyrir þann sem ekki getur með nokkru móti umbreytt stöðu sinni og iðgjaldagreiðslur í verkalýðsfélög hverju sinni ættu að vera forsenda lágmarksalmannatrygginga í þessu sambandi, en þannig er það EKKI, og því vek ég hér með athygli á því hinu sama.

kv.Guðrún María.