Þorláksmessa og skatan.

Hin síðari ár hefur sá siður skapast á mínum bæ, að koma saman á þessum degi og borða skötu, en skötu hef ég borðað frá því ég man eftir mér og þótt góð.

Ólíkt öðrum borða ég líka brjóskið af skötunni en móðir mín heitin sagði mér það að í brjóskinu væri að finna mikilvæg efni fyrir beinin og orð hennar voru mér nægileg í því efni.

Gæti reyndar borðað skötu mun oftar en einu sinni á ári en tillitssemi við nágranna sem ef til vill kunna ekki að meta þennan góða fisk, hefur gert það að verkum að einu sinni á ári er skatan fram borin á mínum bæ, á Þorláksmessudaginn, en ekki oftar.

Það er hins vegar mikill munur á því hvort skatan er verkuð á vestfirzkan máta eður ei og það skal viðurkennt að fyrst þegar ég smakkaði skötu að vestan, fannst mér hún vægast sagt sterk því ég hafði vanist saltaðri skötu hér sunnanlands alla jafna.

Hjá mér er hátíð í bæ að borða skötuna á Þorláksmessu.

kv.Guðrún María.

Athugasemdir

[Jón Ríkharðsson, 23.12.2010 kl. 07:11]

Ég er sammála þér með skötuna, hún er sannkallaður herramannsmatur.

Ég er svo heppinn meða það, að á sjónum hefur skapast sú hefð að bjóða upp á saltfisk og skötu á laugardögum, þannig að ég borða skötu oftast nær einu sinni í viku.

Samt er alltaf sérstök hefð að borða hana á Þorlaksmessu.

[Guðrún María Óskarsdóttir., 23.12.2010 kl. 23:06]

Sæll Jón.

Já mikið ert þú heppinn að fá skötu einu sinni í viku, þetta er mjög góður matfiskur í matarflóruna.

kv.Guðrún María.