Öfga frjálshyggja ellegar algjör forsjárhyggja, ræður ríkjum hér á landi.

Magnmælingar millum kynja skulu eiga sér stað þar sem fyrirtækjum er gert að inna af hendi alls konar skriffinsku í formi áætlana sem ef til vill eru ekki framkvæmanlegar hvað þá framkvæmdin í reynd sinni samkvæmt valdboði.  Dæmi um forsjárhyggju af verstu gerð.

Hugmyndir um að koma af stað sölu áfengis í matvörubúðum undir formerkjum frelsis er aftur dæmi um öfgafrjálshyggju í ljósi þróunar sölu þeirrar hinnar sömu vöru nú þegar hér á landi.

Grunnþjónusta við menntun og heilbrigði er föst í viðjum forsjárhyggju meira og minna.

Kvótakerfi sjávarútvegs er ótrúlegur gerningur þar sem saman fer íslensk útgáfa af forsjárhyggju undir formerkjum frjálshyggju.

Það er ekki fyrr búið að setja lög sem innihalda ákveðna forsjárhyggju af einhverju tagi , en þau hin sömu þarfnast breytinga við sökum þess að þau rekast á önnur lög sem áður höfðu verið samþykkt og innihalda meira frelsi en forsjárhyggjan gerir ráð fyrir í seinni lagasetningunni.

Hinn gullni meðalvegur er vandrataður.

kv.gmaria.

 

Athugasemdir

[J. Einar Valur Bjarnason Maack , 30.11.2007 kl. 15:28]

En gMaría... hvernig er lögleiðing almennrar sölu á löglegri vöru öfgafrjálshyggja?

Það er forsjárhyggja að halda þessu frá okkur eins og við séum of mikil smábörn til þess að umgangast áfengi. Ég er gjörsamlega ósammála því að við þurfum að láta ríkið segja okkur fyrir verkum í þessum málum.

Það eina sem ég sé að mæli á móti því að léttvín og bjór séu seld í matvöruverzlunum er ungur aldur starfsfólksins í þessum sömu verzlunum...

...en fj**dinn hafi það, ef verzlanir geta ekki ráðið til sín fullorðið fólk og haldið í það með því að borga þeim mannsæmandi laun þá ættu þær hvort eð er ekki að fá leyfi til áfengissölu.

Skoðaðu nágrannaríkin. Alla Norð-Vestur Evrópu, þar er áfengissala leyfð í alskonar verzlunum, sama hvort um benzínstöðvar eða þartilgerðar bjórverzlanir er að ræða og það er ekki meira um drykkju eða unglingadrykkju.

Málið er að Íslendingar munu aldrei læra að fara með áfengi af virðingu ef þeir fá aldrei tækifæri til þess að taka sjálfstæðar ákvarðanir án ríkisafskipta. 

Þetta er ekki öfgafrjálshyggja. Öfgafrjálshyggja er að láta frumskógarlögmálið ganga algjörlega,  Öfgafrjálshyggja er hreinn óskipulagður anarchismi án nokkurs samstarfs einstaklinganna í samfélaginu. Slíkt verður aldrei, jafnvel þó að anarchismi yrði við lýði væri hann ekki það frumskógarlögmál sem fólk bendlar við frjálshyggjuna.

Frjálshyggjan er spurning um grundvallar sjálfsvirðingu og virðingu fyrir náunganum til þess að treysta sér og öðrum til þess að taka sjálfstæðar ákvarðanir. Forsjárhyggjan er vanvirðing gagnvart öllum nema valdhöfum, sem brjóta sín eigin lög og sínar eigin reglur hvað ofan í annað.

Hvort vilt þú heldur?